It iis en de dea - exit LC

Ik sil der fuort mar foar út komme, ik bin noch lid fan de Ljouwerter krante. Ik skamje my der foar, mar ik sil der ek net om lige. It is min of te mear per ûngelok, want ik krige altyd allinnich de sneonskrante, mar doe't ik miende in foardielich oanbod te krijen, waard ik lid. Stom, want wat dy goochemerds der net by seine, wie dat ik al fuortendaliks wer opsizze moast, om't myn lidmaatskip oars stilswijend ferlingd waard. En myn bankrekken navenant plundere. Stom, mar hawar.
Oan't safier. Want ik krij aardich myn nocht fan dat bledsje. Dat se Sietske H. yn'e kop fan in artikel betitelje as 'babydoder' (LC, 17-11-2011) fûn ik der bygelyks fier by troch. Dat der okkerdeis in pear berntsjes dea fûn wiene yn in fekânsjehúske yn Terwolde en mem dêr ek swier ferwûne lei, fertelde de LC ús al: 'moeder doodde kinderen Terwolde'. Sjoch, as jo sa fier de Telegraaf-styl hantearje wolle, dan heakje ik ôf. En mei my in hiel soad minsken. Se ha dat by de LC letter op harren webside noch al nuansearre mei in 'vermoedelijk', mar doe wie it leed al dien.
Mar no ha se it dêr yn Ljouwert definityf by my bedoarn. It hat ferzen en dus wurde der riderijen útskreaun. Machtich. Sy wolle dêr yn harren bledsje de gelegenheid ta jaan om foar jo wedstryd te advertearjen. Ek poerbêst. Mar om no, drekt boppe-oan de rou-advertinsjes in eigen advertinsje, kompleet mei swarte râne te setten...

_________________________________________________

HARDRIJDERIJEN

IJSADVERTENTIES

bestemd voor de krant van de volgende dag

kunnen worden opgegeven tot 17.00 op

e-mail: familieberichten@leeuwardercourant.nl

________________________________________________

Ik bin net altyd like fyn fielend, mar no bin ik der wol klear mei. Pynlik foar de minsken dy't in rou-advertinsje yn'e krante stean ha. En ik hoopje foar dy earme, goedmienende, iisklubs net dat se ek it famyljeberjochtetaryf fan de LC hjirfoar betelje moatte, want dan binne se fuort blut.

Moarn belje ik nei Ljouwert, ik jou de moed op. It Friesch Dagblad kin it my wol dwaan!