Keunst en Kultuer?

Sa, ik ha trij wike stil west. Dat komt fansels fan dat boek fan Ferdinand. Of om 't ik it op 't heden fleanende drok ha. In goeie blogger skriuwt alle dagen in nij blog. No dat wurdt mei my noait wat. No en dan wat, dêr moatte jim mei ta.
Folle hie ik ek net om te melden: as ik my al earne drok om makke, wiene der ek al wer mear dy 't dêr oer skreaun hiene, dus dan hat it net folle om 'e hakken en lul der ek noch efkes oer.
Mar no sit my al wat dwers.
Ik sei trije wike lyn al dat der och sa'n soad media op de boekpresintaasje fan Ferdinand ôfkommen wiene. Wol nul, om krekt te wêzen. Ús as twitterders en bloggers net meirekkene dan.
It ynteressearret it provinsjale sjoernaille blykber net in soademiter dat der in boek presinteard wurdt op in histoaryske lokaasje, dêr 't Jan mei de Pet net alle dagen komt. Teminsten, net as hy/sy skjin op 'e graat is. Wy kamen der dus al. Ha'k al sein.
Mar no sit it my nochris ekstra dwers, om 't ik alle dagen konfrontearre wurd mei gelul oer Oerol op Skylge. Hiele siden yn 'e Ljouwerter krante, hiele programma's by de Omrop. Flikkerje dochs op. Ha jim blykber al sinten oer foar soksoarte attraksjes dy 't rûnom en nergens opdûkele wurde en is it ynienen al de muoite wurdich as kultuer útlibbe wurdt op in stik strân? Oh, binne dat unike lokaasjes? Nee, dat wie it gerjochtsgebou blykber net. Dêr hiene jim ek neat te sykjen. Uteraard.

Gerdinen

Juster nei in boekpresintaasje west. Wêrom blog ik dat no pas? Om 't ik tusken de boekpresintaasje en dit tiidstip noch gjin tiid hant ha foar bloggerij. Fandêr.
Mar goed, ik wie dus op dy boekpresintaasje. En mei my in knoarre oare minsken. Allegearre gewoane minsken. Der wiene wol in pear pommeranten by, mar dy gedroegen har net botte pommeranterich, dat dy wiene wol te promjen.
De regionale media wie ek rom fertsjintwurdige. Mar ik tink net út media-oerwagings. Abe de Vries fan Winaam wie der. Eartiids FPB, no Deiblêd (it kin ferkeare blykber). Eelke Lok wie der en Karen Bies (dy 't mei reade koantsjes wachte op in knoffelige sekssêne dy 't net kaam). Johan Veenstra (Stellingwarver) en Hylke Tromp. Koartsein, de muoite wurdich.
It wie in pracht presintaasje. Want Jaap Louwes spile (mei syn fêste begeliedingsgitarist) en ik bin fan fan Jaap. Mar dat net allinnich: de sprekkers wiene ek de muoite fan it beharkjen wol wurdich. Gjin gelul, gjin grutte wurden, gewoan noflike praters. En dat yn it paleis fan justysje. Dat grutte gebou oan it Wilhelminaplein yn Ljouwert. Stoer hear. Je sille it mar foar elkoar krije.
Mar praatsjes ferjitte jo ornaris wer, dat ik kin no wol miene dat soks my bybliuwe sil, úteinlik is dat net wier fansels. Wat my bybliuwt binne dy prachtige, grutte, swiere, blauwe, flewielen gerdinen. Knoerten fan gerdinen. Ik fûn se geweldich. Wylst ik harke nei sprekkers en gesang seach ik al prachtige pakken foar it Iepenloftspul. In oanwinst foar it kleanhok fan Anna Kamstra hjir yn Bitgum.
Mar dan moat de skjirre yn 'e stof. Begrutte my ek alwer, want wat hiel is hoecht net stikken. Dus tocht ik: minsken, as jim dat paleis fan justystje ea restyle of pimpe wolle en jim binne dy gerdinen sêd, dan soe ik graach ien sa'n gerdyn ha wolle. Want ik ha ek in grut rak en sa'n gerdyn, betocht ik juster, is poer geskikt om in moaie tinte fan te bouwen.
Dat jimme it efkes witte.
Mail me mar as it sa fier is.